النفير 5

المشكلة عندي الخوف تكرر مأساة 67 و يقع الجيش أسرى . ما قلتليش هم عملوا ايه في الأسري اللي الدبابات دهستهم ؟ طبعا لا حس و لا خبر ، ولاد الكلب عشان كلب أسمه جلعاد أقاموا الدنيا و لم يقعدوها و موافقين علي أن يفدوه ب 1000 أسير فلسطيني . و من قبل أخذت رمم مش فاكر كام كلب مقابل جميع أسري لبنان . و احنا لا حول و لا قوة إلا بالله عساكرنا انفرمت بالدبابات و لا حياة لمن تنادي .و تقولي روح حارب ، هو في حد حيسأل عني و ألا يقول راح فين ؟ أرفض أن أكون عسكري لا قيمة له . و بعدين إذا كنت أنا عسكري لا قيمة لي فلا داعي لذهابي إلي الحرب . نادي اللي ليهم قيمة أبن الوزير فلان ، و أبن الوزير علان و أبن الباشا ترتان و أبن شهبندر التجار . قولي ليه ما سمعناش عن أبن ترتان أو أبن علان أو أبن فلان أنه مات في الحرب ؟ انت عارف ليه ماسمعتش ؟ لأنهم أصلا ما بيدخلوش الجيش ، و اللي بيدخل و بيموت أحنا بس و هم بعد الحرب يشتروا الأراضي في شرم الشيخ و راس محمد و .. .و ... و هات يا مشاريع في السياحة و المسائل تروق و تحلي . أصل هم أولاد سارة و أحنا اولاد البطة السودا . أحنا نموت و هم يعملوا مشاريع و سياحة في سينا اللي بنموت عشان كل حبة رمل فيها . الله يسهلك يا با روح .