حسن و المجلس الع.ري

فجأة و في نص الليل سمعت صوت ندب و صوات و عويل عالي , فين يا أخوانا مصدر الصوت ,ألحق حلق حوش ، الصوات و الندب ده جاى من عند جارتنا أم حسن .
فيه أيه يا أم حسن؟ مالك ؟
ألحقني يا اخويا , الواد حسن عنده مغص جامد في ناحية اليمين , و لأن الظروف غير مناسبة للخروج بحسن لأي مكان ,نزلت الست أم حسن , و ألحقني يا سعيد يا اخويا ألحقني – سعيد الجزار- ألحقني يا اسطي عاطف – فني تصليح ثلاجات - و ألحقني يا مش عارف مين و مين , و بالفعل تقرر عمل كونسولتو لحسن مكون من سعيد الجزار و عاطف فني الثلاجات و مجدي النجار و هاني الاستورجي و عيد الموان , و كان الاختيار على أساس ان سعيد الجزار يفتح بطن الواد حسن ، و لو الأمور ساءت يمكن يدبحه و يبيعه في المحل لحمة 100% ، و عاطف فني الثلاجات يعمل freezing للوله حسن يعنى يجمده لحين الانتهاء من العملية , و مجدي النجار لأن الأمر ما يسلمش ,قد يحتاج حسن مسمارين يثبتوا ضلوعه ,و هاني الاستورجي لأجل يدهن الجرح .
و دور عيد لو احتاج الأمر تلييس فهو خير يليس على بطن حسن على أساس إنها مرمة .
و صعد الكنسولتو و على رأسهم فيلسوف الغبرة , و فجأة يُفتح باب الاسانسير فيقابل الجميع المهندس اشرف .
على فين يا جماعة؟ هو فيه أيه؟ مالكم ؟
• اصل الواد حسن عيان و طالعين نشوفه .
• ناويين نكشف عليه .
• حنعالجه يعنى إن شاء الله . أيوه . أمال احنا طالعين نلعب ؟
رد المهندس أشرف انزل يا واد يا مجنون أنت و هو , ملعون أبوكم كلكم ولاد ستين كلب بهايم .
انتم تعرفوا حاجة في الطب ؟
رد فيلسوف الغبرة : و هو يعنى المجلس العسكري كان عارف حاجة في السياسة ولا في الاقتصاد ولا في الاجتماع , ولا في أي حاجة ؟ ده ما يعرفش غير المدفع و الطيارة و الدبابة .
و لا هو حرام على ناس , حلال على ناس تانية
بطلوا بقى التفرقة دي , وبعدين دى عنصرية .
و ما زال الضرب علي ودنه ، و الله علي ودنه .