زغرودة

زغرودة ، زغرودة عالية قوي قوي قوي قوييييي . و علي و علي و علي الصوت اللي يزغرد مش حيموت ، وعلي رأي أخونا القصاص علي الضحكاية علي . لتسقط الثورة و ليسقط الثوار و ليسقط التحرير و كل ميادين التحرير ، و ليسقط كل المندسين و المتآمرين و أصحاب الأجندات الخارجية ، و اللي بيقبضوا من برة ، اللي من جوة لأه ، و ليسقط الشهداء ، و ليسقط كل من فُقأت عينه شمال كانت أو يمين أو حتى الأتنين ليسقط الجميع و ليحيا البكش ( برنجي كنجي شنجي ) . ألف آلآف مبروك يا أم محمود و انت يا أم حسن و يا أم فلان و علان و ترتان ، (( جدع يا باشا كلت عين الواد )) طلع براءة ، ألف مليون مبروك . و ليحيا الهلس و التعريص و التدليس و ليحيا البانجو و التيمون و عقبال الباقين اللي قتلوا و اللي شبحوا و اللي كسروا ضلوع الغلابة .
و بناء عليه إلي كل فاقئي العيون أفعلوا ما شئتم ، و أفقئوا عيون من شئتم ، و أقيموا سلخاناتكم و أصعقوا من شئتم ، فنحن في ظل قانون ساكسونيا .
إلي المدافعين عن القتلة ( هَا أَنْتُمْ هَؤُلاءِ جَادَلْتُمْ عَنْهُمْ فِي الْحَيَاةِ الدُّنْيَا فَمَنْ يُجَادِلُ اللَّهَ عَنْهُمْ يَوْمَ الْقِيَامَةِ أَمْ مَنْ يَكُونُ عَلَيْهِمْ وَكِيلاً ) (النساء:109) .
إلي الثوار في كل ميادين التحرير ، إلي المندسين ، إلي العملاء والخونة ، إلي كل من ضحي لأجل مصر لأجل الوطن أقول لكم : سيبوكم من فيلم مصر ، سيبوكم من الوطن ، فالوطن occupied .
و ليكن ما قدمتموه لوجه الله ، فما عند الله باق ، أما ما عند الوطن ال occupied ف........
و تعيشي يا ضحكة مصر .